Самар ауданының Бастаушы ауылында күрделі жөндеуден өткен дәрігерлік амбулаторияның салтанатты ашылу рәсімі өтті. Жаңартылған амбулатория өз жұмысын қайта бастап, ауыл тұрғындарына медициналық қызмет көрсетуге барынша қолайлы жағдай жасады.

Қазіргі заманғы медициналық құрал-жабдықтармен жабдықталған амбулатория енді кең ауқымды қызметтер ұсына алады. Оған күндізгі стационар жағдайындағы емдеу және вакцинациялау да кіреді. Бұл ауыл тұрғындары үшін өте маңызды, өйткені енді олар қалалық медициналық мекемелерге бармай-ақ, қажетті медициналық көмек ала алады.

Амбулаторияда жалпы тәжірбиелік дәрігер мен екі орта медициналық қызметкер жұмыс істейді. Жөндеу жұмыстары мен жаңа жабдықтардың арқасында дәрігерлер науқастарға дәлірек диагноз қойып, тиімді ем жүргізе алады. Бұл ауылдық жерлерде медициналық көмектің сапасын арттырады.

Ашылу рәсіміне көптеген қонақтар қатысты. Олардың қатарында Самар ауданы әкімінің міндетін атқарушы Ж. Майкенев, Бастаушы ауылының ардагерлері, Самар аудандық орталық ауруханасының қызметкерлері және жергілікті тұрғындар болды. Барлық қатысушылар амбулаторияны жаңғыртудың маңыздылығын және оның ауыл тұрғындарының денсаулығы мен әл-ауқатын жақсартудағы рөлін атап өтті.

Амбулаторияның жөндеуден өтуі — ауылдық жерлерде медициналық қызмет сапасын жақсартуға бағытталған тағы бір маңызды қадам. Бұл жергілікті тұрғындардың денсаулығын нығайтуға және медициналық көмектің қолжетімділігін арттыруға өз үлесін қосады.